Gal 6 | KhmKCB | STEP | បងប្អូន អើយ ! បើ អ្នកណា ម្នាក់ ធ្វើ បាប ចូរឲ្យ អ្នករាល់គ្នា ដែល ដើរតាមព្រះ វិញ្ញាណ កែតម្រង់ អ្នកនោះ ដោយ ចិត្ត ស្លូតបូត ហើយត្រូវ ប្រយ័ត្ន ខ្លួនឯង ក្រែងលោ អ្នក ក៏ ត្រូវល្បួង ដែរ

Galatians 6

1 បងប្អូនអើយ! បើអ្នកណាម្នាក់ធ្វើបាបចូរឲ្យអ្នករាល់គ្នាដែលដើរតាមព្រះវិញ្ញាណកែតម្រង់អ្នកនោះដោយចិត្តស្លូតបូតហើយត្រូវប្រយ័ត្នខ្លួនឯងក្រែងលោអ្នកក៏ត្រូវល្បួងដែរ 2 ចូរជួយរំលែកបន្ទុកគ្នាទៅវិញទៅមកធ្វើដូច្នេះទើបអ្នករាល់គ្នាសម្រេចតាមក្រឹត្យវិន័យរបស់ព្រះគ្រិស្ដ 3 ដ្បិតបើអ្នកណាគិតថាខ្លួនជាអ្វីមួយប៉ុន្តែមិនមែនជាអ្វីសោះអ្នកនោះបញ្ឆោតខ្លួនឯងហើយ។ 4 ផ្ទុយទៅវិញចូរឲ្យម្នាក់ៗពិសោធការប្រព្រឹត្តិរបស់ខ្លួនចុះពេលនោះគេនឹងមានអំនួតចំពោះតែខ្លួនឯងប៉ុណ្ណោះមិនមែនចំពោះអ្នកដទៃទេ 5 ដ្បិតម្នាក់ៗត្រូវលីបន្ទុករបស់ខ្លួន។ 6 ចូរឲ្យអ្នកដែលរៀនព្រះបន្ទូលចែករំលែករបស់ល្អៗទាំងអស់ដល់អ្នកដែលបង្រៀន។ 7 កុំឲ្យចាញ់បញ្ឆោតឡើយគ្មានអ្នកណាចំអកឲ្យព្រះជាម្ចាស់បានទេដ្បិតអ្នកណាព្រោះអ្វីអ្នកនោះនឹងច្រូតបានផលនោះឯង។ 8 ដ្បិតអ្នកដែលព្រោះខាងសាច់ឈាមរបស់ខ្លួនអ្នកនោះនឹងច្រូតបានសេចក្ដីពុករលួយពីសាច់ឈាមរីឯអ្នកដែលព្រោះខាងព្រះវិញ្ញាណអ្នកនោះនឹងច្រូតបានជីវិតអស់កល្បជានិច្ចពីព្រះវិញ្ញាណ 9 ចូរយើងកុំនឿយណាយនឹងប្រព្រឹត្តល្អឡើយព្រោះបើយើងមិនល្វើយទេដល់វេលាកំណត់យើងនឹងច្រូតបានផលជាមិនខាន។ 10 ហេតុនេះកាលណាយើងមានឱកាសយើងត្រូវប្រព្រឹត្តល្អចំពោះមនុស្សទាំងអស់ជាពិសេសចំពោះបងប្អូនរួមជំនឿ។ 11 មើល៍ខ្ញុំសរសេរអក្សរធំៗមកអ្នករាល់គ្នាដោយដៃខ្ញុំផ្ទាល់ថា 12 អ្នកដែលចង់សម្ញែងខ្លួនខាងសាច់ឈាមអ្នកទាំងនោះបានបង្ខំឲ្យអ្នករាល់គ្នាកាត់ស្បែកដើម្បីកុំឲ្យពួកគេត្រូវបៀតបៀនដោយឈើឆ្កាងរបស់ព្រះគ្រិស្ដប៉ុណ្ណោះ 13 ដ្បិតពួកអ្នកកាត់ស្បែកខ្លួនគេផ្ទាល់មិនកាន់តាមគម្ពីរវិន័យទេប៉ុន្តែពួកគេចង់ឲ្យអ្នករាល់គ្នាកាត់ស្បែកដើម្បីឲ្យពួកគេបានអួតខ្លួនដោយសារសាច់ឈាមរបស់អ្នករាល់គ្នា។ 14 រីឯខ្ញុំវិញសូមកុំឲ្យខ្ញុំអួតអំពីអ្វីឡើយក្រៅពីឈើឆ្កាងរបស់ព្រះយេស៊ូគ្រិស្តជាព្រះអម្ចាស់របស់យើងហើយដោយសារឈើឆ្កាងសម្រាប់ខ្ញុំលោកិយត្រូវបានឆ្កាងហើយរួចសម្រាប់លោកិយខ្ញុំក៏ដូច្នោះដែរ 15 ដ្បិតការកាត់ស្បែកឬមិនកាត់ស្បែកមិនមែនជាអ្វីឡើយសំខាន់គឺការកើតជាថ្មី 16 សូមឲ្យសេចក្ដីសុខសាន្តនិងសេចក្ដីមេត្តាករុណាមានដល់អស់អ្នកដែលរស់នៅតាមគោលការណ៍នេះព្រមទាំងជនជាតិអ៊ីស្រាអែលរបស់ព្រះជាម្ចាស់។ 17 ចាប់ពីពេលនេះតទៅកុំឲ្យអ្នកណាម្នាក់បង្កបញ្ហាឲ្យខ្ញុំទៀតដ្បិតខ្ញុំមានស្លាកស្នាមរបស់ព្រះយេស៊ូនៅលើរូបកាយរបស់ខ្ញុំស្រាប់ហើយ។ 18 បងប្អូនអើយ! សូមឲ្យព្រះគុណរបស់ព្រះយេស៊ូគ្រិស្តជាព្រះអម្ចាស់របស់យើងស្ថិតនៅជាមួយវិញ្ញាណរបស់អ្នករាល់គ្នាចុះអាម៉ែន។